ମୁମ୍ବାଇରୁ ଆସିଥିବା ଏକ ଚମକଦାର ଘଟଣା ସମସ୍ତଙ୍କୁ ଭୟଭୀତ କରିଛି। ଖବର ଅନୁସାରେ, ବିରିୟାନି ଖାଇବା ପରେ ତରଭୁଜ ଖାଇଥିବା ଗୋଟିଏ ପରିବାରର ଚାରି ଜଣଙ୍କ ଅସୁସ୍ଥତା ଓ ମୃତ୍ୟୁ ଘଟିଥିବା ଦାବି ହେଉଛି। ଏହା ପରେ ଲୋକଙ୍କ ମନରେ ଉଠିଛି ବଡ଼ ପ୍ରଶ୍ନ—ତରଭୁଜ ଖାଇବାର ଠିକ୍ ଉପାୟ କ’ଣ?
ତରଭୁଜ ହେଉଛି ପାଣିରେ ଭରପୂର ଏକ ସ୍ୱାସ୍ଥ୍ୟକର ଫଳ। ଏହା ଶରୀରକୁ ହାଇଡ୍ରେଟ୍ ରଖିଥାଏ, ପେଟ ସଫା କରେ ଏବଂ ଗ୍ରୀଷ୍ମରେ ଶରୀରକୁ ଥଣ୍ଡା ରଖେ। କିନ୍ତୁ ଭୁଲ୍ ସମୟରେ କିମ୍ବା ଭୁଲ୍ ଖାଦ୍ୟ ସହ ଏହା ଖାଇଲେ ପାଚନ ସମସ୍ୟା ଦେଖାଦେଇପାରେ।
କଟା ତରଭୁଜକୁ ଦୀର୍ଘ ସମୟ ଫ୍ରିଜ୍ରେ ରଖିବା ମଧ୍ୟ ଖତରନାକ୍ ହୋଇପାରେ। ବିଶେଷଜ୍ଞମାନଙ୍କ କହିବା ଅନୁଯାୟୀ, ଅଧିକ ସମୟ ରଖାଯାଇଥିବା ତରଭୁଜରେ ସାଲମୋନେଲା ଓ ଇ-କୋଲାଇ ଭଳି ଜୀବାଣୁ ବଢ଼ିପାରେ। ସେଥିପାଇଁ ତରଭୁଜ କାଟିବା ପରେ ତୁରନ୍ତ ଖାଇଦେବା ଭଲ।
ଆଉ ଏକ ମହତ୍ୱପୂର୍ଣ୍ଣ କଥା—ରାତିରେ କିମ୍ବା ଭାରୀ ଖାଦ୍ୟ ଖାଇବା ପରେ ତରଭୁଜ ଖାଇବାକୁ ଏଡାନ୍ତୁ। ବିଶେଷକରି ଚିକେନ୍, ମାଛ, ଅଣ୍ଡା କିମ୍ବା ପନିର ପରେ ତରଭୁଜ ଖାଇଲେ ବଦହଜମୀ, ପେଟ ଫୁଲିବା ଓ ଗ୍ୟାସ୍ ସମସ୍ୟା ହୋଇପାରେ।
ତରଭୁଜ ଖାଇବା ପରେ ସହସା ପାଣି ପିଇବା ମଧ୍ୟ ଭଲ ନୁହେଁ। ଏହା ପେଟର pH ସ୍ତରକୁ ପ୍ରଭାବିତ କରି ଅସୁବିଧା ସୃଷ୍ଟି କରିପାରେ।
ଦହି କିମ୍ବା ଅନ୍ୟ କ୍ଷୀରଜାତ ଖାଦ୍ୟ ସହ ତରଭୁଜ ଖାଇବାକୁ ମଧ୍ୟ ବିଶେଷଜ୍ଞମାନେ ମନା କରୁଛନ୍ତି। ଏହା ହଜମ ପ୍ରକ୍ରିୟାକୁ ବାଧା ଦେଇ ପେଟ ଖରାପ କରିପାରେ।
ଏହାସହିତ କମଳା, ଲେମ୍ବୁ କିମ୍ବା ମୌସମୀ ପରି ଖଟା ଫଳ ସହ ତରଭୁଜ ଖାଇବା ମଧ୍ୟ ପାଚନ ସମସ୍ୟାର କାରଣ ହୋଇପାରେ।
ସେଥିପାଇଁ ମନେରଖନ୍ତୁ—
ତରଭୁଜ ଖାଆନ୍ତୁ, କିନ୍ତୁ ସଠିକ୍ ସମୟରେ, ସଠିକ୍ ପଦ୍ଧତିରେ ଓ ସଠିକ୍ ଖାଦ୍ୟ ସହିତ। ତେବେ ମିଳିବ ଏହାର ପୂର୍ଣ୍ଣ ସ୍ୱାସ୍ଥ୍ୟ ଲାଭ।
