ଟାୟାର ଫାଟି ହଠାତ୍ ଲାଗିଗଲା ଭୟଙ୍କର ନିଆଁ ।
ଅଳ୍ପକେ ଦୁର୍ଘଟଣାରୁ ବର୍ତ୍ତିଲେ ଚାଳକ ।
ଅଗ୍ନିଶମ ବାହିନୀର ତତ୍ପରତାରେ ନିଆଁକୁ କରାଗଲା ଆୟତ୍ତ ।
ଘଟଣା ଘଟିଛି ଯାଜପୁର ଜିଲ୍ଲା ପାଣିକୋଇଲି ଥାନା ନିକଟସ୍ଥ ଓଭରବ୍ରିଜ ଉପରେ ।
ସୂଚନା ଅନୁଯାୟୀ, ଆଜି ସକାଳେ ଏକ ମୋରମ ବୋଝେଇ ହାଇୱା ଚଣ୍ଡିଖୋଲରୁ ଭଦ୍ରକ ଅଭିମୁଖେ ଯାଉଥିଲା ।
ଏହି ସମୟରେ ପାଣିକୋଇଲି ଓଭରବ୍ରିଜ ଉପରେ ହଠାତ୍ ଗାଡ଼ିର ଟାୟାର ଫାଟିଯାଇଥିଲା ।
ତାପରେ ଗାଡ଼ିଟିରେ ନିଆଁ ଲାଗିଯାଇଥିଲା ଏବଂ କିଛି ସମୟ ମଧ୍ୟରେ ସମଗ୍ର ହାଇୱା ଜଳିଉଠିଥିଲା । ଗାଡ଼ିରୁ ଧୂଆଁ ଓ ନିଆଁ ବାହାରୁଥିବା ଦେଖି ଡ୍ରାଇଭର ସତର୍କତାର ସହିତ ଗାଡ଼ିରୁ ବାହାରି ଆସିଥିଲେ ।
ଫଳରେ ଏକ ବଡ଼ ଅଘଟଣ ଟଳିଯାଇଛି ।
ସ୍ଥାନୀୟ ଲୋକ ତୁରନ୍ତ ଯାଜପୁର ରୋଡ଼ ଅଗ୍ନିଶମ ବିଭାଗକୁ ଖବର ଦେଇଥିଲେ ।
ଖବର ପାଇ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ଦୀର୍ଘ ସମୟର ଉଦ୍ୟମ ପରେ ନିଆଁକୁ ଆୟତ୍ତ କରିଥିଲେ ।
ସୌଭାଗ୍ୟବଶତଃ ଏହି ଘଟଣାରେ କାହାରି ପ୍ରାଣହାନି ହୋଇନାହିଁ ।
ସେପଟେ ପାଣିକୋଇଲି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
