ଝାରସୁଗୁଡ଼ା ରାଜନୀତିରେ ପୁଣି ତୀବ୍ର ଚର୍ଚ୍ଚା।
ବିଜେପି ନେତା Tankadhar Tripathyଙ୍କୁ ସୁପ୍ରିମକୋର୍ଟରୁ ବଡ଼ ଝଟକା।
ଓଡ଼ିଶା ହାଇକୋର୍ଟଙ୍କ ରାୟକୁ କାଏମ ରଖିଲେ ସୁପ୍ରିମକୋର୍ଟ।
ଟଙ୍କଧର ତ୍ରିପାଠୀଙ୍କ ଆବେଦନ ଖାରଜ ହେବା ପରେ ଏବେ ନିର୍ବାଚନୀ ମାମଲାର ଶୁଣାଣି ହାଇକୋର୍ଟରେ ଜାରି ରହିବ।
ଝାରସୁଗୁଡ଼ା ବିଧାନସଭା ନିର୍ବାଚନୀ ବିବାଦକୁ ନେଇ ବିଜେପି ନେତା ଟଙ୍କଧର ତ୍ରିପାଠୀଙ୍କୁ ସୁପ୍ରିମକୋର୍ଟରୁ ଲାଗିଛି ବଡ଼ ଝଟକା।
ଟଙ୍କଧରଙ୍କ ପକ୍ଷରୁ ଦାଖଲ ହୋଇଥିବା ଆବେଦନକୁ ଖାରଜ କରିଦେଇଛନ୍ତି ସୁପ୍ରିମକୋର୍ଟ।
ଏହା ସହ ଓଡ଼ିଶା ହାଇକୋର୍ଟ ପୂର୍ବରୁ ଯେଉଁ ରାୟ ଦେଇଥିଲେ, ତାହାକୁ ମଧ୍ୟ କାଏମ ରଖିଛନ୍ତି ଶୀର୍ଷ ଅଦାଲତ।ଏହି ମାମଲା ଝାରସୁଗୁଡ଼ା ବିଧାନସଭା ନିର୍ବାଚନକୁ କେନ୍ଦ୍ର କରି ହୋଇଥିଲା।
ଟଙ୍କଧର ତ୍ରିପାଠୀଙ୍କ ବିଜୟକୁ ଚ୍ୟାଲେଞ୍ଜ କରି କଂଗ୍ରେସ ନେତ୍ରୀ Dipali Das ଓଡ଼ିଶା ହାଇକୋର୍ଟରେ ନିର୍ବାଚନୀ ମାମଲା ରୁଜୁ କରିଥିଲେ।
ନିର୍ବାଚନ ପ୍ରକ୍ରିୟାରେ ଅନିୟମିତତା ଓ କିଛି ଅଭିଯୋଗକୁ ଆଧାର କରି ଏହି ମାମଲା ଦାଖଲ ହୋଇଥିଲା।
ପରେ ଟଙ୍କଧର ତ୍ରିପାଠୀଙ୍କ ପକ୍ଷରୁ ମୂଳ ମାମଲାକୁ ବିନା ଶୁଣାଣିରେ ଖାରଜ କରିବାକୁ ହାଇକୋର୍ଟରେ ଆବେଦନ କରାଯାଇଥିଲା।
କିନ୍ତୁ ହାଇକୋର୍ଟ ସେହି ଆବେଦନକୁ ଖାରଜ କରି ମୂଳ ନିର୍ବାଚନୀ ମାମଲାର ଶୁଣାଣି ଜାରି ରଖିବାକୁ ନିର୍ଦ୍ଦେଶ ଦେଇଥିଲେ।
ଏହା ପରେ ଟଙ୍କଧର ତ୍ରିପାଠୀ ସୁପ୍ରିମକୋର୍ଟର ଦ୍ୱାରସ୍ଥ ହୋଇଥିଲେ।ସୁପ୍ରିମକୋର୍ଟରେ ଶୁଣାଣି ସମୟରେ ହାଇକୋର୍ଟଙ୍କ ରାୟକୁ ଚ୍ୟାଲେଞ୍ଜ କରାଯାଇଥିଲା।
କିନ୍ତୁ ଶୀର୍ଷ ଅଦାଲତ ହାଇକୋର୍ଟଙ୍କ ନିଷ୍ପତ୍ତିରେ କୌଣସି ହସ୍ତକ୍ଷେପ କରିବାକୁ ମନା କରିଥିଲେ।
ଫଳରେ ବର୍ତ୍ତମାନ ମୂଳ ନିର୍ବାଚନୀ ମାମଲାର ଶୁଣାଣି ହାଇକୋର୍ଟରେ ପୂର୍ବବତ୍ ଜାରି ରହିବ।
ଏହି ରାୟ ପରେ ଝାରସୁଗୁଡ଼ାର ରାଜନୈତିକ ପରିବେଶ ପୁଣି ଗରମ ହୋଇଯାଇଛି।
ଦୁଇ ଦଳର ନେତାମାନେ ଏହାକୁ ନେଇ ନିଜ ନିଜ ପ୍ରତିକ୍ରିୟା ଦେଉଥିବାବେଳେ, ଏବେ ସମସ୍ତଙ୍କ ନଜର ରହିଛି ଓଡ଼ିଶା ହାଇକୋର୍ଟରେ ଚାଲିଥିବା ଏହି ମାମଲାର ପରବର୍ତ୍ତୀ ଶୁଣାଣି ଉପରେ।
