ସୋସିଆଲ ମିଡିଆର ମୋହ କେତେ ଦୂର ପର୍ଯ୍ୟନ୍ତ ଏକ ପରିବାରକୁ ଭାଙ୍ଗିପାରେ, ତାହାର ଏକ ଚମକପୂର୍ଣ୍ଣ ଉଦାହରଣ ଏବେ ସାମ୍ନାକୁ ଆସିଛି । ଇନଷ୍ଟାଗ୍ରାମ ରିଲ୍ସ କରିବାକୁ ନେଇ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଦୀର୍ଘଦିନ ଧରି ଚାଲିଥିବା ବିବାଦ ଶେଷରେ ଏମିତି ଏକ ଘଟଣାକୁ ଜନ୍ମ ଦେଇଛି, ଯାହା ଏବେ ସୋସିଆଲ ମିଡିଆରେ ଭୟଙ୍କର ଭାବରେ ଭାଇରାଲ ହେଉଛି ।
ଜୀବିତ ସ୍ତ୍ରୀଙ୍କର ଶୁଦ୍ଧିକ୍ରିୟା କରିଛନ୍ତି ସ୍ୱାମୀ । ହଁ ଦର୍ଶକବନ୍ଧୁ, ଆପଣ ଠିକ୍ ଶୁଣୁଛନ୍ତି ।
ଭିଡିଓରେ ଦେଖିବାକୁ ମିଳୁଛି, ଜଣେ ବ୍ୟକ୍ତି ଧୋତି ପିନ୍ଧି ପୂଜାପାଠ ଓ ରୀତିନୀତି ଅନୁସାରେ ନିଜ ସ୍ତ୍ରୀଙ୍କ ଶୁଦ୍ଧିକ୍ରିୟା କରୁଛନ୍ତି । ସ୍ତ୍ରୀଙ୍କ ଫଟୋରେ ଫୁଲମାଳ ପିନ୍ଧାଇ ତାହାକୁ ନଦୀରେ ଭସାଇ ଦେଉଥିବା ଦୃଶ୍ୟ ମଧ୍ୟ ଭାଇରାଲ ଭିଡିଓରେ ସ୍ପଷ୍ଟ ହେଉଛି ।
କେବଳ ସେତିକି ନୁହେଁ, ଫଟୋକୁ ବାରମ୍ବାର ଛେପ ପକାଉଥିବା ଦୃଶ୍ୟ ମଧ୍ୟ କ୍ୟାମେରାରେ ରେକର୍ଡ ହୋଇଛି ।
ସୂଚନା ଅନୁସାରେ, ମହିଳାଜଣକ ଇନଷ୍ଟାଗ୍ରାମରେ ରିଲ୍ସ କରୁଥିଲେ ଓ କିଛି ଭିଡିଓକୁ ନେଇ ସ୍ୱାମୀ ଅସନ୍ତୋଷ ପ୍ରକାଶ କରୁଥିଲେ । ସ୍ୱାମୀଙ୍କ ଅଭିଯୋଗ ଅନୁଯାୟୀ, ସେ ବାରମ୍ବାର ସ୍ତ୍ରୀଙ୍କୁ ବୁଝାଇଥିଲେ, କିନ୍ତୁ ସେ ତାହାକୁ ଅନୁଦେଖା କରିଥିଲେ ।
ଶେଷରେ ଅତିଷ୍ଟ ହୋଇ ସ୍ୱାମୀ ନିଜ ସ୍ତ୍ରୀଙ୍କୁ ଜୀବନରୁ ଅଲଗା କରିଦେବା ପାଇଁ ଏଭଳି ପଦକ୍ଷେପ ନେଇଥିବା କୁହାଯାଉଛି ।
ଏହି ଭିଡିଓ ଭାଇରାଲ ହେବା ପରେ ସୋସିଆଲ ମିଡିଆରେ ମିଶ୍ର ପ୍ରତିକ୍ରିୟା ଦେଖିବାକୁ ମିଳିଛି ।
କେହି କହୁଛନ୍ତି, ସୋସିଆଲ ମିଡିଆ ପାଇଁ ପରିବାରକୁ ଅବହେଳା କରିବା ଭୁଲ ।
ଆଉ କେହି କହୁଛନ୍ତି, ଜୀବିତ ବ୍ୟକ୍ତିଙ୍କ ଶୁଦ୍ଧିକ୍ରିୟା କରିବା ଅତ୍ୟନ୍ତ ଅମାନବୀୟ ଓ ଅସଂବେଦନଶୀଳ ।
ତେବେ ଏହି ଘଟଣା କେଉଁଠାରେ ଘଟିଛି ଓ ଭିଡିଓର ସତ୍ୟତା କେତେଦୂର, ସେନେଇ ସ୍ପଷ୍ଟ ସୂଚନା ଏପର୍ଯ୍ୟନ୍ତ ମିଳିନାହିଁ ।
ସୋସିଆଲ ମିଡିଆ ଆଜିର ଦିନରେ ମନୋରଞ୍ଜନ ଓ ଆୟର ଏକ ବଡ଼ ମାଧ୍ୟମ ହୋଇପାରିଛି । କିନ୍ତୁ ଯଦି ଏହା ପରିବାରିକ ସମ୍ପର୍କରେ ଦୂରତା ସୃଷ୍ଟି କରେ, ତେବେ ସମାଜ ପାଇଁ ଏହା ଚିନ୍ତାର ବିଷୟ ବୋଲି କୁହାଯାଉଛି ।
